Kthehu lart

Ambasadori i ri i Kosovës në Shkup Dedaj u prit nga zëvendëskryeministri i Maqedonisë Osmani

Ambasadori i ri i Kosovës në Shkup Dedaj u prit nga zëvendëskryeministri i Maqedonisë Osmani GazetaExpress

Zëvendëskryetari i Qeverisë së Maqedonisë për Çështje Evropiane Bujar Osmani, mbajti takim me ambasadorin e sapo emëruar të Republikës së Kosovës në vend, Gjergj Dedaj, njoftoi kabineti i Osmanit.

"Zëvendëskryeministri Osmani, së pari përgëzoi ambasadorin për emërimin e tij në këtë post dhe shprehu shpresë se bashkëpunimi i deritanishëm jashtëzakonisht i suksesshëm në mes dy shteteve, do të vazhdojë edhe gjatë mandatit të tij.

“Kemi një numër të projekteve të përbashkëta të cilat realizohen, siç është pika kufitare “Bellanoc- Stançiq“, si dhe një numër i projekteve të tjera nga programi për bashkëpunim ndërkufitar që janë duke u zhvilluar ose janë në pritje të realizimit, për suksesin e të cilave besoj se do të përkushtohemi bashkarisht”, theksoi Osmani.

Në takim u hapën edhe temat e progresit të dy vendeve në kuadër të integrimit evropian, si dhe progresi i përgjithshëm i rajonit në aspektin e perspektivave evropiane.

“Parlamenti dha dritën e pare të gjelbër për ndryshimet kushtetuese në përputhje me marrëveshjen e Prespës, me të cilën jo vetëm që u hap rruga për implementimin e detyrimeve  sipas marrëveshjes, por gjithashtu krijoi kushte për përshpejtimin e procesit reformues të vendit”- theksoi Osmani. Duke potencuar suksesin e Marrëveshjes së Prespës, por edhe më herët marrëveshjen e fqinjësisë së mirë me Bullgarinë, si nxitje edhe për vendet tjera në rajon, për të bërë përpjekje dhe më shumë guxim në tejkalimin e mosmarrëveshjeve të ndërsjella si një interes i përbashkët i të gjithë rajonit.

Në vazhdim, të dy bashkëbiseduesit ranë dakord se do të vazhdojnë të punojnë me përkushtim në drejtim të promovimit të marrëdhënieve ndërmjet dy vendeve, në mënyrë që të mbështesin njëra-tjetrën në integrimet evropiane euroatlantike", thuhet në komunikatën nga kabineti i Osmanit.

    Data: 19 Nentor 2018 13:33
    Autori: GazetaExpress

    Të tjera